神耆小子丨魯振順感恩與偶像Kent哥合作　樊亦敏露香肩玉臂拍「床照」

TVB《神耆小子》在昨晚（5月13日）播出第6集揭開不少謎團，原來當年找人打跛趙子勇（蕭正楠飾）的幕後黑手並非錢大海（鄭則士飾），而是錢有方（傅嘉莉飾）前夫。

趙一鳴（冼靖峰飾）與多多（羅毓儀飾）亦被揭出不是子勇及繼來（曹永廉飾）的親生仔女，前者是子勇離世哥哥的兒子、後者是繼來前妻出軌司機後所出。昨晚焦點場口，落在聶鎮江（魯振順飾）使計陷害繼來及大海的劇情上。

神耆小子丨蕭正楠冼靖峰被指有父子相　Archie自爆要求與Kent哥重拍咬耳仔戲

▲ 《神耆小子》

感恩能與偶像Kent哥合作

與繼來鬧翻的聶總，為了將自己利益最大化，竟以50萬港元企圖勾結阿Jack（吳子冲飾）拍下與大海紅顏知己洪玫瑰（樊亦敏飾）的床照，該幕兩大亮點分別是魯振順表情多多的搞笑演出，以及樊亦敏（Amy）的超性感「床照」。

為營造氣勢，聶總相約Jack到陽光普照的天台講數，身穿白Tee的Jack不但熱至滿頭大汗，雙眼更被曬至睜不開；相反聶總全程氣定神閒，着住Mark哥褸的他還振振有詞說道：「我想試好耐架喇，你覺唔覺得上嚟天台講秘密，係一件好有型嘅事？」整場戲感覺似是向經典電影《無間道》致敬。

問到場口拍攝難忘事，魯振順透露場口曾因天雨問題延誤拍攝，並坦言正式拍攝當日高溫難擋：「係好熱呀，熱到我要食正氣丸，現場工作人員好好，畀咗啲藿香正氣片我食。Amy又好好，借咗把遮畀我遮太陽。」

魯振順飾演的聶總不但市儈奸險，真實EQ還相當低，經常大發雷霆，據知就連鄭則士（Kent哥）亦坦言角色很難拿捏，並大讚魯振順的趣怪演出大大提升了角色的入屋度。

魯振順事後謙稱全靠劇本寫得好，並感恩能與偶像Kent哥合作：「Kent哥好好，凡事有商有量，我請教佢佢又好謙虛咁話唔使，大家拍攝時好似一家人咁，氣氛好好，佢畀咗好多信心同安全感我。」

▲ 《神耆小子》

Amy直言盡性感

至於Amy劇中的「床照」，雖然只是合成照，但為了逼真度，玫瑰還是躺在床上露出大半個膊頭及手臂拍攝合成原材料。

Amy受訪時坦言已是盡了力去性感，並笑言：「張床照係特登影嘅，露咗一邊手臂出嚟，都好難得吓，驚再露太多會引起恐慌。」

▲ 《神耆小子》

她還笑言劇集的「露點擔當」，落在Kent哥、Archie及子冲身上：「子冲同我遲啲會有床戲，佢會冇着衫、滿頭大汗咁攬住我，仲會爬出窗添。呢套劇嘅男士，裸露程度係多過女士嘅。Kent哥第一集已經露咗兩點，子冲都成日露兩點，Archie都有露點，老中青三代都露晒點。」

昨晚一集另一搞笑位，是Amy為掩護私會中的阿Jack，竟想到在大海面前無厘頭大跳《叉燒包》，Amy的超投入的忘我演出，贏得不少正評。

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5